Данте Егзум од Партизан и Лука Вилдоза од Црвена Звезда се лути ривали во големото финале од АБА-лигата, но австралискиот и аргентинскиот ас би можеле да станат соиграчи од наредната сезона, и тоа во дресот на Панатинаикос. „Зелените“ од Атина долго се мачат да направат чекор напред во Евролигата, а газдите на клубот се надеваат дека со доаѓањето на Ергин Атаман од Ефес за нов тренер конечно ќе се атакува и на трофејот во елитното европско натпреварување.
Раководството на клубот му ветило на турскиот тренер и сериозен буџет за засилувања, а на врвот на листата со желби се наоѓаат токму Егзум и Вилдоза. Според грчките медиуми договорот со Аргентинецот е постигнат уште пред два месеци, досега беше споменувано дека ПАО го бара и Кевин Пантер, но последните информации говорат дека на врвот на листата со желби е Егзум.
„Данте Егзум е прва желба на ПАО за позицијата плејмејкер. Тоа е доволен доказ за високите амбиции што тимот ќе ги има во новата сезона. Егзум дојде во Партизан минатото лето од Барселона и од самиот старт на сезонава е меѓу најважните играчи кај Жељко Обрадовиќ“, пишува грчкиот новинар Толис Коцијас.
Останува да се види дали овие најави ќе се реализираат и Партизан и Црвена Звезда ќе останат без овие важни играчи за наредната сезона. Кај Партизан се најавува и заминување на Пантер и на Лесор, додека Црвена Звезда дефинитивно ќе остане и без Кампацо, а се најавува и трансфер на Добриќ во редовите на Виртус Болоња.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
