Искусниот чувар на мрежата Александар Стојаноски во следната сезона ќе го брани голот на Бутел Скопје. Стојаноски, кој потекнува од Струмица, настапуваше за Зомимак, Младост Богданци, Борец, Струга, Охрид, Јуниор КВ, Тиквеш и за босанската Искра Бугојно.
Како што информираат од РК Бутел, овој голман има искуство од настапи во регионалната СЕХА лига и во европските купови.
„Чест и задоволство е да е носи дресот на Бутел Скопје, клуб што секоја година е во врвот на македонскиот ракомет. Клубот го краси одличната атмосфера, другарство и борбата на терен, па секој би сакал да дојде овде. Имаме одличен млад тим, а заедно со тренерот Горан Кузманоски кој е желен за работа и успеси, верувам дека сите заедно ќе напредуваме и ќе ја оствариме зацртаната цел на клубот“, изјави Стојаноски.
Претходно Бутел го ангажираше стратегот Горан Кузманоски, десното крило Дамјан Георгиев и левиот бек Лука Иваниќ, а соработките беа продолжени со Бојан Блажески, Кристијан Давитковски и со Димитар Ѓоргиевски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
