Во отсуство на натпреварот помеѓу Шкендија и Струга ТЛ во битката на два конкуренти за титула сезонава, дербито во денешните натпревари од 2. коло во ПМФЛ е во Скопје, на стадионот „Борис Трајковски“ се среќаваат лутите ривали Вардар и Шкупи. Не треба да се напоменува низ минатото колку внимание предизвикувале натпреварите меѓу двата тима, а сега во една сосема поинаква улога.
Вардар по враќањето во прволигашката конкуренција ја бара првата победа во сезоната, а Шкупи, пак, по поразот во првото коло од Работнички исто така ги бара првите бодови во сезоната 2023/24.
Вардарци на овој меч ќе настапат комплетни, со оглед дека ги регистрираа и новите играчи, странците Алберт, Матеус и Педрињо, и тие ќе бидат во комбинација веднаш. Шкупи, пак, изминатата недела остана без услугите на Хамиди и Цефас, но затоа беа донесени три нови играчи Хаџиќ, Нилтон Родригес и Луан Абази.
После победата над Вардар, АП Брера сака да ја продолжи серијата и против новиот прволигаш Воска Спорт. И важат за фаворити струмичани и во овој натпревар, особено ако се има во предвид дека против Вардар одиграа солиден натпревар, и само Гаќевски спаси да забележат поубедлива победа. Воска Спорт, пак, со несреќен пораз од Шкендија со гол во 89. минута во првото коло беа поразени од Шкендија.
После Скопје, се очекува интересно да биде во Кратово. Силекс го пречекува тимот на Работнички, два претенденти за излез во Европа идната сезона. Работнички одлично ја стартуваше сезоната со триумф над Шкупи, додека Силекс на гости во Штип беше поразен и ги бара првите бодови во сезоната.
Гостивар ја бара првата победа по враќањето во прволигашката конкуренција, а денеска на свој терен го чека тимот на Тиквеш, кој, пак, одлично ја стартуваше сезоната со победа над Македонија ЃП. „Лавовите“ од Ѓорче Петров на свој терен го пречекува тимот на Брегалница.
ПМФЛ, 2. КОЛО (ДЕНЕСКА, 17:00 Ч.)
Струмица: АП БРЕРА – ВОСКА СПОРТ
Гостивар: ГОСТИВАР – ТИКВЕШ
Скопје, Ѓорче Петров: МАКЕДОНИЈА ЃП – БРЕГАЛНИЦА
Кратово: СИЛЕКС – РАБОТНИЧКИ
Скопје, Маџари: ВАРДАР – ШКУПИ
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
