Феникс 2010 забележа преубедлив пораз во првиот натпревар од квалификациите за ФИБА Еврокупот кои ги игра во Никозија, Кипар. Подобар од македонскиот тим беше домаќинот Керавнос кој славеше со 107-60 во натпревар во кој што ја имаше целосната контрола и во нападот и во одбраната.
Кипарскиот тим ја превзема иницијативата уште од самиот старт на натпреварот во кој поведе со 9-2, а резултатската контрола ја задржа до самиот крај. Феникс 2010 сепак не дозволи рано високо водство на домашниот тим и успеа да се врати во игра при што му парираше на противникот, но само до воведните минути од втората четвртина кога резултатот гласеше 19-18 по што следеше серија од 12-0 која беше преголем залак за скопјани.
Керавнос на полувремето замина со позитива од 48-34, а сите дилеми за победникот ги реши во третата четвртина. Во неа Кипраните реализираа со речиси 78 отстотност од игра па постигнаа 40 поени, а притоа одиграа одлично и во одбраната каде го лимитираа Феникс 2010 на 17 поени со што ја зголемија предноста на +37 (88-51) пред последната четвртина која беше само формалност и во која шанса добија и најмладите играчи на македонскиот претставник.
Со 14 поени, 5 скокови и 3 асистенции лидер на Феникс 2010 беше Стивенс, додека Рис додаде 11 поени. За Керавнос Рејнолдс забележа „дабл-дабл“ од 17 поени и 10 асистенции, а 16 поени и 9 скокови постигна Тејлор.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
