Младиот македонски судија Игор Стојчевски, кој е неполна година на листата на меѓународни судии, е постојано ангажиран од страна на Судиската комисија на УЕФА, која им дава шанса на младите перспективни судии да судат се почесто. Во текот на октомври веќе судеше и ќе суди на три натпревари што е јасен доказ дека има добиено добри оценки од контролорите.
На 8. октомври беше главен судија на средбата во Бугарија во Лигата на европските шампиони за млади екипи меѓу Лудогорец и Динамо Минск (0-2). Му помагаа Слаѓан Марковски и Бранко Путилин.
На 17. октомври го судеше мечот во квалификациите за Европското пренство, играчи до 21 година меѓу Хрватска и Белорусија (2-0). Му помагаа Гоце Петровски и Слаѓан Маркоски, а четврти судија беше Стојанче Трпчевски.
Овој месец доби нова покана од УЕФА, на 25. октомври ќе биде главен судија на натпреварот меѓу младите фудбалети на Лајпциг и Црвена звезда во Лигата на европските шампиони. Помошници ќе му бидат Слаѓан Марковски и Куштрим Лика.
Игор Стојчевски ќе нема одмор овој месец бидејќи Судискиот одбор на ФФМ го одреди за главен судија на скопското дерби меѓу Работнички и Вардар кое се игра денеска од 14 часот. Ќе му помагаат Дејан Димитриевски и Дарко Јовчевски, четврти судија ќе биде Јосип Бартон.
М.М.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
