Продолжува очајната сезона за Динамо Загреб кој синоќа доживеа нов пораз во Конференциската лига, овој пат на домашен терен од Викторија Плзен.
За хрватскиот шампион ова е четврти пораз во последните пет меча што е сериозен аларм за сите во клубот. А, навивачите, пак, бараат сериозни промени и во играчки кадар и во стручен штаб поради што синоќа по натпреварот со силни свирежи и навреди ги избркаа фудбалерите од теренот на „Максимир“.
По дуелот, пак, преку социјалните мрежи порачаа дека тренерот Сергеј Јакировиќ мора да го напушти клубот затоа што е далеку од личност која треба да го води Динамо.
„Како што дојде онака одеднаш така треба да си оди. Јакировиќ ќе плати со глава, но има и играчи кои мора да заминат од клубот. Поголемиот дел од играчите не заслужуваат да го носат дресот на Динамо“ – се пишувањата од страна на навивачите на Динамо.
Според некои, пак, треба да се заврши полусезоната а потоа голема чистка во соблекувалната…
„Ова е најслабиот Динамо во последните 15 години. Браво за сите“ – порачуваат навивачите на хрватскиот шампион.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
