Еден од најтрофејните македонски кошаркари, Горан Самарџиев ќе седне на „жешкото столче“ на клупата на Работнички каде воедно ќе наследи уште една легенда на клубот, Димитар Мираковски кој доби отказ по лошиот старт на сезоната. „Центарци“ една седмица беа во потрага по тренер, начелно беше разговарано со неколку стратези, но прв избор отсекогаш беше Самарџиев, кој ќе добие шанса да ги нападне трофеите на македонската сцена како тренер на Работнички.
Кавадарчанецот голем дел од својата играчка кариера ја помина во „Градски Парк“, а сега го очекува уште една тешка задача да го врати сјајот својот клуб како во славните години кои за него се добро познати.
За популарниот „Шуш“ тоа ќе биде трет ангажман во тренерската кариера која започна во Еуро Никел. Со кавадаречкиот тим стигна до финалето во сезоната 2020/21, но потфрли претходната сезона која „сино-белите“ ја завршија во четвртфиналето од разигрувањето за титула по што следеше ангажман во словачкото првенство од каде доаѓа и во Работнички.
Тој ја почна сезонава во Словачка, од каде си замина и покрај добрите резултати на тимот, по што беше слободен за пресела на кормилото на најтрофејниот македонски кошаркарски колектив.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
