Денеска во 13 часот се играат четири натпревари од Првата македонска фудбалска лига. Најинтересно ќе биде во битката за дното на табелата, каде што на „Борис Трајковски“ во Маџари на лош терен, Вардар го дочекува составот на Воска Спорт.
Ова е една од последните шанси за Вардар да се одлепи од последното место. Ако денеска не триумфира, или ако загуби, тогаш мисијата за „црвено-црните“ во битката за опстанок ќе биде многу тешка. Разликата меѓу двата тима е два бода во корист на Воска. Евентуален триумф на тимот од Охрид, ќе го оддалечи од дното пет бодови, нешто кое Вардар тешко ќе го надомести, со оглед на проблемите од секаква природа.
Во Струмица, АП Брера ќе го дочека тимот на Струга ТЛ. Брера триумфираше во Струга на првиот одигран меѓусебен натпревар сезонава, и сега шампионот ќе бара одмазда.
„Првиот меч беше многу добар. Нашиот противник играше во Европа, и почетокот на сезоната не им беше најдобар. Но, сега се во добра форма, имаат многу добри играчи и ги почитуваме. Многу добро играме и ние во последно време, и тоа го покажавме и во Купот кога немавме среќа по пеналите. Ќе биде многу тешко но имаме јасна идеја како сакаме да играме, што сакаме да правиме за време на натпреварот“, рече Џовани Валенти, тренерот на АП Брера.
Од таборот на Струга ТЛ најавуваат продолжување на добрата серија на резултати.
„Се наоѓаме во добра форма, особено после победата над Шкендија. Атмосферата е одлична во тимот и се надевам дека така ќе биде и против АП Брера. Го респектираме противникот, но јас верувам дека ако одиграме како против Шкендија, верувам дека од Струмица ќе се вратиме со позитивен резултат“, вели Бесарт Ибраими.
Денеска исто така има уште една многу важна битка за опстанок. Гостивар го пречекува тимот на Брегалница. Поради лошата состојба на теренот во Гостивар, овој натпревар ќе се игра во Голема Речица.
Во четвртиот меч, Шкендија на свој терен бара „рехабилитација“ против Тиквеш, за поразот од Струга ТЛ минатото коло. Тетовскиот тим треба да победи ако сака да го задржи чекорот со водечките.
ПРВА ЛИГА, 14. КОЛО
ДЕНЕСКА, 13:00 ЧАСОТ
Скопје, Маџари: ВАРДАР – ВОСКА СПОРТ
Струмица: АП БРЕРА – СТРУГА ТЛ
Тетово: ШКЕНДИЈА – ТИКВЕШ
Г.Речица: ГОСТИВАР – БРЕГАЛНИЦА
НЕДЕЛА, 13:00 ЧАСОТ
Скопје, Ѓорче Петров: МАКЕДОНИЈА ЃП – РАБОТНИЧКИ
Кратово: СИЛЕКС – ШКУПИ
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
