Ракометарите на Е. Пелистер вечерва од 18:45 часот против унгарски ПИК Сегед во нов обид конечно да дојдат до првиот бод во Лигата на Шампионите. Предизвикот не е наивен, во Битола доаѓа ривал од кој „пелистерци“ загубија со 34-26 минатата седмица, но тоа беше меч во кој македонскиот првак 40 минути целосно му парираше на унгарскиот состав.
Тоа, без сомнение, носи надеж и за тренерот Бранислав Ангеловски, кој на мечот ќе има засилување и во името на македонскиот репрезентативец Филип Кузмановски, кој ќе дебитира по потпишаниот договор со битолскиот клуб.
Ангеловски пред дуелот со ПИК Сегед вели дека клучно ќе биде неговите ракометари да успеат да ги надминат големите падови во играта кои ги следат во речиси сите европски натпревари сезонава.
„Пред нас е ривал со кого одигравме добро прво и катастрофално второ полувреме, тоа е нешто што не смее да ни се случи во Битола. Добро го познаваме Пик Сегед, ќе бидат засилени и со неколку ракометари кои не настапија во Унгарија, но ние ќе имаме што да покажеме. Најмногу ме разгрижува тоа што лесно се предадовме, иако имавме активен резултат до 50. минута. Пред нашите симпатизери и верни навивачи, од кои имаме огромна поддршка, верувам во подобро издание и подобар резултат од тој во Сегед“, вели Ангеловски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
