Партизан стигна до нова значајна победа во Евролигата, откако на домашен терен славеше над Жалгирис (81-72). Во главна улога беше Американецот Доужер, кој одигра беспрекорен меч и ги предводеше „црно-белите“ до 12. евролигашка победа сезонава. Жалгирис почна изненадувачки добро и за неколку минути поведе со 3-13, но потоа на сцена стапи Доужер, кој само во првата четвртина постигна 15 поени и целосно го врати Партизан во мечот. „Црно-белите“ имаа плус осум во третиот период, Жалгирис благодарение на тројките на Еванс се врати, но гостите немаа одговор на серијата на Партизан во последната четвртина. Во клучните моменти профункционира и одбраната на тимот на Жељко Обрадовиќ, кој прими 13 поени во четвртата четвртина, постигна 20 и заслужено стигна до победата.
Доужер одигра извонредно со 23 поени, 4 асистенции и две украдени топки, одличен беше и Ледеј со 21 поен, додека Еванс вообичаено беше најдобар во таборот на Жалгирис со 25 постигнати поени.
Валенсија неочекувано лесно и убедливо славеше во шпанското дерби против Басконија, и тоа на гостински терен со резултат . Кошаркарите на Валенсија доминираа од самиот почеток, уште во првото полувреме стигнаа до двоцифрена предност што успеаја да ја претворат во конечен триумф. Басконија во последниот период намали на три поени со тројката на Џордан Теодор (56-59), но следеше нова серија на гостите кои заслужено се радуваа на победата. Дејвис со 19 поени беше прв стрелец на Валенсија, 12 постигна Џонс, додека Монеке со 16 поени беше најдобар поединец во таборот на Басконија.
Барселона претрпе уште еден гостински пораз, овојпат во Италија на дуелот против Милано (74-70). Клучно се покажа првото полувреме што каталонците го одиграа катастрофално, па италијанскиот првак замина на одмор со предност од 47-28. Каталонците доцна се разбудија, стигнаа на пет поени негатива на две минути до крајот, но немаа сили за целосен камбек. Шејвон Шилдс покажа дека повредата е минато предводејќи го Милано со 23 поени, пет скока и пет асистенции, а најефикасен кај Барса беше Јан Весели со 28 поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
