Тренерот на МЗТ Скопје Аеродром, Васко Атанасов, разбирливо беше пресреќен по синоќешната убедлива победа над Широки (85-69) во првиот четвртфинален плејоф меч од АБА2, која за македонскиот шампион носи голема шанса за место меѓу четирите најдобри екипи.
Но, работата не е завршена бидејќи има и реванш следната среда во БиХ, за што е свесен и стратегот на „металците“, кој ја „спушта топката“ и најавува смирување на еуфоријата се додека не биде остварена конечната цел.
„Задоволен сум од играта, особено во второто полувреме во кое дојдовме до посакуваната разлика дури и без Ејасу Ворку (играше само четири минути) и Бојан Крстевски, кои беа повредени. Ништо од ова немаше да се случи без фанатичната поддршка од трибините, на што им се заблагодарувам на нашите навивачи. Предноста веќе ништо не ни значи, бидејќи за реваншот ќе се подготвуваме како да почнуваме од 0-0. Верувам во своите момци и мислам дека можеме да продолжиме во ваков ритам, секако со претходно одработување на задачата во македонското првенство“ – вели Атанасов.
МЗТ Скопје пред вториот меч против Широки ќе мора да ги одмериме силите со Гостивар и тоа в сабота (13. април) на домашен терен од 18 часот во вториот дуел од четвртфиналето од плејофот во Македонија, во кој тимот од Аеродром води со 1-0 а кој се игра до три победи.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
