Младата женска одбојкарска репрезентација на Македонија до 18 години загуби на првиот натпревар од втората рунда во квалификациите за пласман на Европското првенство 2024.
На квалификацискиот турнир од Групата Б кој се игра во Врњачка Бања, Србија, избраничките на селекторот Александар Митев во три сета, со 17-25, 15-25 и 16-25, загубија од домаќинот Србија.
И покрај поразот младите македонски одбојкарки одиграа повеќе од квалитетен меч против една од најдобрите светски селекции, потврдувајќи го својот потенцијал но и заслужениот пласман во втората квалификациска рунда.
Ивана Милева беше најдобра поентерка во македонскиот тим со седум поени, а Матеа Петровска и Андротеа Милевска реализираа по четири поени.
Македонија денеска од 16:30 часот во второто коло игра против Холандија, која во првото коло со 3-2 славеше против Чешка.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
