Македонската кошаркарска репрезентација до 20 години настапот на Европското првенство во „А“ дивизија кое се одржа во Полска го заврши со триумф славејќи против Црна Гора со 81-69. Со тоа тимот предводен од Боро Смилковски го заврши првенството на 15. место.
Силите беа изедначени на стартот на натпреварот, а во неефективната прва четвртина на семафорот стоеше резултат 11-15. Македонија го најде својот ритам во втората четвртина која ја доби со 26-12 со одлична игра и во одбраната па поведе со двоцифрена предност (37-27).
Македонските кошаркари моментумот го пренесоа и на отварањето на третата четвртина па ја удвоија предноста на +20 (62-42) пред последните десет минути и го решија победникот на средбата. Опуштеноста во македонските редови Црногорците ја искористија за ублажување на поразот, во еден момент негативата стигна беше и едноцифрена (75-67), но „црвено-жолтите“ не дозволија камбек.
Со 15 поени Теодор Симиќ беше прв стрелец на Македонија, а него го следеа Бојчев и Стојаноски со по 13 поени и Бошалески со 12 поени. Иванов постигна 11 поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
