Ангажманот на Перо Антиќ во стручниот штаб на Феникс санс на еден од натпреварите на „сонцата“ во рамките од Летната лига на НБА сосема очекувано и оправдано стана вест во македонската јавност, ако се знае дека Антиќ е актуелен претседател на Кошаркарската Федерација на Македонија.
Тој има на маса понуда од својот поранешен тренер Мајк Баденхолцер да му се приклучи во Феникс, но плановите на Антиќ очигледно се поврзани со Македонија, ако се суди по денешното соопштение од КФСМ поврзано на оваа тема…
Во него, јасно се става до знаење дека Антиќ планира да остане на чело на мак-баскетот, но никаде не се објаснува како од тој негов ангажман во Феникс ќе профитира македонската кошарка.
„Спортот ќе го оставиме на спортистите, а ќе ја изоставиме политиката и влијанието од ‘надворешни сили’.“ – вака започна приказната на Перо Антиќ како Претседател на раководното тело на кошарката во Македонија.
Наместо да сме среќни и горди што имаме врвен, професионален однос со екипи и раководни лица во Европа и ‘преку океанот’, ние тоа го користиме за сензационализам и за валкање на нечие име и однос.
Перо Антиќ не бара работа. Перо Антиќ има доволно работа во Македонија и сето она што го ‘работи’ надвор од границите е отворање на врати исклучиво во интерес на македонската кошарка и ЗА македонската кошарка. Благодарение на таа работа, во Македонија за неколку седмици ќе пристигне Хорхе Гарбахоса, Претседателот на ФИБА Европа, а неколку дена по него ќе пристигне и Андреас Заглис, Генералниот Секретар на ФИБА свет којшто е еден од највлијателните лица во светската кошарка. Секојдневната комуникација со ФИБА и со НБА резултира со голем број на проекти, летни лиги, кампови и разни обуки на стручни лица во кошарката кои придонесуваат за развојот во Македонија. Во иднина очекуваме зголемување на обем на работата и проектите на Федерацијата за добро на сите кошаркарски работници.
Клубовите кои се вознемирени од ваквите написи и веќе нè контактираа ги уверуваме дека ќе продолжиме да ја оправдуваме довербата која несебично ни ја даваат во текот на сиве овие години. Секој кој продолжува да го валка името на овој тим, поединечно или како целина, само докажува за својот личен карактер и зли намери“, се вели во соопштението на КФСМ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
