Матс Хумелс е слободен играч на пазарот по истекот на договорот со Борусија Дортмунд, а последните информации говорат дека германскиот ветеран би можел да се пресели во редовите на Реал Мадрид.
Рома и Милан покажаа интерес за 35-годишниот ветеран, но во последната седмица во преден план во трката се најде Болоња, која испрати и понуда од два милиони евра годишна плата во наредните две сезони за да го доведе Хумелс во својот табор. Германецот беше сериозно заинтересиран, но преговорите се стопирани откако и Реал Мадрид реши да се вклучи во трката по довчерашниот играч на Борусија Дортмунд.
Анчелоти инсистира на нов дефанзивец откако Начо си замина од Мадрид, а Јоро го избра Манчестер Јунајтед. Во ситуација кога Реал има доволно дефанзивци за стартниот тим, а неопходна е резервна опција Хумелс делува како идеално решение, играч кој може да помогне со своето искуство, а нема да инсистира на минутажа кај Анчелоти.
Шпанските медиуми тврдат дека првичниот контакт е веќе воспоставен, Хумелс е сериозно загреан за преселба на „Сантијаго Бернабеу“, па сега се чека само дали Реал ќе сака финансиски да ја израмни понудата на Болоња за трансферот да се официјализира, или ќе следи период на пазарење и тактизирање во преговорите.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
