Реал Мадрид дефинитивно е во криза, откако во првиот меч по фијаското со Барселона „кралевите“ вечерва загубија на домашен терен од Милан со 1-3, втор пораз за европскиот првак во првите четири рунди од новиот формат во Лигата на Шампионите. Анчелоти немаше одговор за својот поранешен клуб, „росонерите“ одиграа извонредно на тактички план и знаеја како да ги искористат своите шанси.
Тиав го донесе Милан во водство по корнерот на Пулишиќ, а Реал единствениот гол го постигна со пеналот на Винисиус, што Бразилецот сам го изнуди по минимален контакт со Емерсон Ројал. Мората му постигна гол на својот поранешен клуб за 1-2, а отворената игра на Реал во вториот дел беше казнета кога Реиндерс стрелаше прецизно низ нозете на Лунин по одличното додавање на Рафаел Леао. Килијан Мбапе сигурно повторно ќе биде критикуван ако се знае дека Французинот се најде во неколку убави ситуации, но не успеа да најде начин да го совлада сонародникот Мајк Мењон на голот на Милан.
Рубен Аморим го декласираше Пеп Гвардиола, Спортинг славеше со 4-1 над Манчестер Сити во претпоследниот меч што португалскиот стручњак го води во таткотвината пред да се пресели во Премиер-лигата на клупата на Манчестер Јунајтед. „Граѓаните“ први поведоа преку Фоден, имаа и неколку зицери за втор гол, но откако не ги искористија на сцена стапи Виктор Гијокереш. Шведскиот ас постигна хет-трик за Спортинг, еден гол реализираше и Араухо, а Ерлинг Халанд промаши пенал за Сити при резултат 1-3.
Ливерпул му одржа лекција на Баер Леверкузен славејќи со 4-0 на „Енфилд“. Чаби Алонсо немоќно гледаше како неговиот тим капитулира во второто полувреме, во кое Луис Дијаз постигна хет-трик, а Коди Гакпо еден гол за „црвените“, додека Салах го заврши мечот со две асистенции.
Борусија Дортмунд долго се мачеше, но на крајот успеа да слави на домашен терен над Штурм со 1-0 со голот на Мален на асистенција на Гираси. Минимално славеше и Монако на гостувањето против Болоња, со 0-1 со погодокот на Тимо Керер на три минути до крајот.
Елиф Елмас одигра половина полувреме за Лајпциг на гостувањето против Селтик, македонскиот репрезентативец влезе при 2-1, а неговиот тим на крајот претрпе пораз од 4-1. Лил и Јувентус одиграа 1-1 во Франција, домаќините први поведоа со голот на Давид во првото полувреме, во вториот дел бод за „старата дама“ спаси Влаховиќ со гол од пенал.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
