Олимпија Милано славеше против големиот фаворит Реал Мадрид во Евролигата со 85-76, благодарение на македонскиот репрезентативец Ненад Димитријевиќ, кој со 22 постигнати поени беше најдобар поентер на натпреварот.
По мечот, тренерот на Милано, Еторе Месина, сосема очекувано, не штедеше пофални зборови за Димитријевиќ.
„Ете, погледнете сами каква игра демонстрира. А, да не заборавиме дека Нено е само дебитант во Евролигата. Во последната четвртина во Виторија и против Виртус имаше големо влијание на играта. Сигурен сум дека ако се навикне физички на лигата, ќе остави навистина силна трага во Евролигата. Тој и Манион синоќа имаа сериозен тест против рапсоложениот Кампацо кој сакаше да победи“ – истакна тренерот на италијанскиот тим.
Месина вели дека конкуренцијата во тимот ќе биде добредојдена за Димитријевиќ.
„Кога се ќе се сумира, Димитријевиќ мислам дека ќе профитира од доаѓањето на Манион, затоа што ќе ги поделат одговорностите. Имаат различни стилови на игра. Ако продолжат да работат добро, можат заедно да растат, а тоа ќе биде добро за тимот“ – вели Месина.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
