Берлин планира повторно да се кандидира за домаќин на Олимписките игри, потенцијално точно 100 години откако германскиот главен град беше домаќин на контроверзните Игри во 1936 година, одржани под нацистичкиот режим.
Градоначалникот на Берлин, Кај Вегнер, ќе ги презентира плановите за кандидатура во вторник на Олимпискиот стадион во Берлин, со поддршка на четири други германски покраини – Бранденбург, Саксонија, Мекленбург и Холштајн – кои исто така би биле домаќини на натпреварите на ЛОИ 2036.
Во поканата за презентацијата, која беше испратена во петок, не е наведено за кои Игри во Берлин се пријавува, но како најверојатна опција е наведена 2036 година – стогодишнината од Игрите во 1936 година. Германската олимписка спортска асоцијација соопшти дека е можна и кандидатура за Игрите во 2040 година.
Олимписките игри во 2028 година ќе се одржат во Лос Анџелес, а домаќин на игрите во 2032 година ќе биде Бризбејн, Австралија.
Олимпискиот стадион во Берлин, изграден само за Игрите во 1936 година, сè уште е во употреба денес. Стадионот бил дизајниран и изграден под личен надзор на Адолф Хитлер, откако нацистите ја презеле власта во 1933 година. Иако првично бил против организацијата на Игрите, Хитлер подоцна го видел нивниот пропаганден потенцијал и ја ангажирал режисерката Лени Рифенштал да го направи филмот „Олимпија“ за настанот.
Стадионот и денес служи како дом на фудбалскиот клуб Херта од Берлин, а минатата година беше домаќин на финалето на Европското првенство помеѓу Шпанија и Англија. Во сабота таму ќе се игра финалето од Купот на Германија меѓу Штутгарт и Арминија од Билефелд.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
