Од ФК Шкупи преку официјално соопштение информираа зошто на време не успеале да договорат стадион за денешниот домашен натпревар против Силекс во 2. коло од ПМФЛ кој е откажан и со службена победа на кратовци од 0-3.
Чаирчани не обезбедија на време соодветен стадион кој ги исполнува минималните услови за ВАР-имплементација, а како што информираат причина за откажувањето на натпреварот е ФК Беласица со која најпрво се договориле и добиле одобрение натпреварот да се одигра во Струмица, а потоа сосема неочекувано струмичани го повлекле одобрувањето.
Во прилог од ФК Шкупи го лиферуваат и одобрувањето за одигрувањето на натпреварот од ФК Беласица издадено на 15. август.
СООПШТЕНИЕТО ОД ФК ШКУПИ ВО ГО ПРЕНЕСУВАМЕ ВО ЦЕЛОСТ:
Прво, сакаме да им се извиниме на сите наши фанови за предизвиканите непријатности.
Сакаме јасно да ја објасниме ситуацијата:
• Постигнавме договор со сопствениците на стадионот во Струмица да го одиграме натпреварот таму и добивме нивно писмено одобрение (можете да го видите на фотографијата во прилог).
• Набрзо потоа ја известивме Фудбалската федерација на Македонија (ФФМ), а натпреварот е официјално регистриран и потврден во системот.
• За жал, во последен момент сопствениците на стадионот го повлекоа одобрувањето, создавајќи непотребен проблем за сите нас и за прволигашкиот фудбал.
Од оваа причина ФК Шкупи ќе го однесе случајот пред суд и ќе ги следи сите законски процедури.
Што се однесува до нашиот стадион, веќе започнаа работите за поставување на ВАР системот. Следниот домашен натпревар планираме да го одиграме на нашиот стадион, пред вас – нашите сакани навивачи.
Во овој процес се надевавме дека клубовите во Македонија ќе покажат солидарност и разбирање, што ќе ни овозможи да одиграме барем еден „домашен“ натпревар. За жал, не видовме таква поддршка; наместо тоа, нашиот пат стана уште потежок.
Конечно, имаме апел до сите политички партии: Ве молиме не користете го фудбалот за вашите политички кампањи и не мешајте се во нашиот спорт. Фудбалот им припаѓа на навивачите, играчите и клубовите. Оставете да се соочиме и ги решиме нашите предизвици заедно со нашите фанови. Бидејќи ФК Шкупи не е само клуб – тоа е нашето големо семејство. Со нашите навивачи, рамо до рамо, ќе ја надминеме секоја пречка и ќе продолжиме напред.
Ви благодариме за довербата и посветеноста.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
