Легендарниот репрезентативец на БиХ, Емир Спахиќ, сега директор на националната селекција на оваа земја, викендов беше гостин во нашата земја, при што дел од слободното време мина и во просториите на ФФМ каде имаше конструктивна средба со првиот човек на мак-фудбалот, Масар Омерагиќ.
„Драго ми е што во “Куќа на фудбалот” му бев домаќин на Емир Спахиќ, актуелниот директор на репрезентацијата на Босна и Херцеговина.
Емир, заедно со селекторот Сергеј Барбарез и нивните соработници во последната година направија “лавовски” добра работа за босанскиот фудбал.
Разговаравме отворено и конструктивно, разменивме искуства и информации околу организацијата, стручната поставеност и развојните процеси во репрезентацијата.
Со посебен акцент разговаравме за работата со младинските категории, како и на следењето и интеграцијата на талентираните деца од дијаспората, кои ги следиме преку нашата скаутинг служба.
Верувам дека ваквите средби придонесуваат за подобра соработка и унапредување на фудбалот во регионот.
Спахиќ ни посака успех со македонската репрезентација, а јас сум уверен дека со заедничка посветеност и јасна визија можеме да продолжиме да го развиваме фудбалот на вистински начин“, напиша Омерагиќ по средбата со босанската фудбалска легенда.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
