На „Сантијаго Бернабеу“ се подготвува мал летен ремонт на тимот на Реал Мадрид. Особено се очекуваат промени во одбраната на „кралевите“, која оваа сезона има доста проблеми, и покрај тоа што беа донесени Хујсен, Трент Александар-Арнолд и Карерас.
Се шпекулираше дека на неколку играчи Реал Мадрид ќе им се заблагодари и ќе им ја покаже излезната врата. Пред се тука се мисли на Давид Алаба, а пред заминување беше и Антонио Рудигер.
И додека процентот за заминување на Алаба и натаму е висок, за германскиот интернационалец истиот се намалува. По доаѓањето на клупата на Алваро Албероа, Рудигер почна да игра стандарно, и тоа добро во одбраната, се зацврсти последниот „бедем“ пред голманите, па затоа сега се случува пресврт во таборот на „кралевите“.
Сега Рудигер е пред останување во Реал Мадрид, па дури газдата Флорентино Перез наскоро ќе му понуди нова соработка, со што 33-годишниот Германец ќе остане подолго во таборот на Реал. Актуелниот договор на Рудигер е од крајот на сезоната, но во следните денови се очекува да биде продолжен на барем уште една година.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
