Како што пренесуваат дел од светските спортски медуми, хрватскиот стратег Славен Билиќ е во преговори со Фудбалската асоцијација на Гана и би можел да стане нов селектор на нивната репрезентација.
Доколку тоа се случи, Билиќ би можел да ја предводи Гана на Светското првенство оваа година во САД, Мексико и Канада.
Фудбалската асоцијација на Гана наводно сериозно го разгледува Билиќ за нов селектор откако претходниот селектор, Ото Адо, беше отпуштен.
Билиќ наводно веќе имал разговори со челниците на Фудбалската асоцијација и е меѓу најсериозните кандидати за селекторската позиција. Неговото име не е единствено на листата, бидејќи има и други познати тренерски имиња во конкуренцијата, како што се Карлос Кеирош и Фернандо Сантос, поранешни селектори на Португалија.
Засега, најверојатното сценарио е Билиќ да потпише краткорочен договор што би траел неколку месеци, до крајот на Светското првенство. Таквиот договор би му овозможил на Фудбалскиот сојуз на Гана да се заштити во случај на лоши резултати на Светското првенство.
Билиќ не е активен од 2024 година, кога го напушти саудискиот Ал-Фатех. За време на неговата тренерска кариера, тој ја водеше хрватската репрезентација од 2006 до 2012 година, а беше и тренер на англискиот Вест Хем Јунајтед и турскиот Бешикташ. Сепак, неговиот најпознат период останува оној со хрватската репрезентација.
За Билиќ, ова би била можност да се врати на големата сцена по неколкугодишно отсуство. Гана, која е во истата група со Хрватска, претставува предизвик, но и шанса за тренер кој веќе има успех на светската сцена.
Репрезентацијата на Гана има неколку талентирани играчи, меѓу кои и Мохамед Кудус, кои покажаа дека можат да бидат сериозна закана на Светското првенство.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
