Поранешниот напаѓач на Њујорк Ред Бул, Бредли Рајт-Филипс, го предупреди Кристијано Роналдо (41) да не се сели во американската МЛС лига.
Рајт-Филипс верува дека напаѓачот на Ал-Наср би имал тешкотии да се справи со повторувањето на „магијата“ што Лионел Меси (38) продолжува да ја покажува во Интер Мајами и дека таков трансфер би ризикувал да го расипе неговото наследство.
Рајт-Филипс ја советуваше португалската суперѕвезда да избегнува потенцијален трансфер во САД бидејќи, како што тврди, тоа би можело да му го наруши угледот. Иако имаше шпекулации дека Роналдо би можел да му се придружи на Меси во САД пред пензионирањето, Рајт-Филипс верува дека физичките барања на лигата и високите очекувања од глобалните икони би го направиле тој потег многу ризичен.
Како позитивен пример, тој го истакна Меси, чии игри за Интер Мајами го подигнаа глобалниот статус на лигата, а во исто време одржуваа елитно ниво на теренот.
„Не би сакал да го видам Кристијано Роналдо во МЛС, сега е предоцна. Меси е сè уште на ниво каде што може да ги помине играчите во ситуација еден на еден. Не сум сигурен дали Кристијано може да создаде таква магија сега. Ако не е во вистинската форма, доаѓањето во МЛС би можело да го уништи неговото наследство“, рече Рајт-Филипс, поранешен англиски фудбалер кој играше за Манчестер Сити, Саутемптон, Чарлтон, Брентфорд, Њујорк, ЛАФЦ и Колумбус.
„Кога ќе се сетам на натпреварите на Оливие Жиру во ЛАФЦ, за мене како навивач на Арсенал беше тешко да ги гледам. Тој не ја добиваше поддршката што му беше потребна и беше само сенка од играчот што некогаш беше, што беше малку тажно. Мислам дека истото може да му се случи и на Кристијано. Неговото доаѓање би го привлекло вниманието кон лигата што ја сакам, но искрено, не верувам дека тоа ќе се случи“, смета Рајт-Филипс, денешен помошник-директор на Њујорк Ред Бул.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
