ЕКИПА во Малта,
Горан Бошев
Агон Елези го привлече вниманието на домашната спортска јавност со повеќе од квалитетното издание во средниот ред на дуелот против Италија.
Елези не крие дека е среќен што за првпат беше стартер во македонскиот дрес, и тоа против европскиот шампион, потенцирајќи сега од овде од Малта дека тоа му е само дополнителен мотив за сите нови предизвици со репрезентацијата.
„Среќен сум за освоениот бод против Италија и за добиената шанса да играм од првата минута во дресот на Македонија. Мислам дека имавме еден навистина успешен натпревар со неутрализација на противникот во средниот ред, и успеавме да ја искористиме својата шанса и за погодок. Мислам дека покажавме карактер со игра до крај против европскиот шампион. Им благодарам и на навивачите затоа што дојдовме до заслужен бод против една таква екипа“ – вели Елези, веднаш дополнувајќи:
„Сега не чека една сосема друга приказна против Малта. Сега ние сме тие кои ќе треба да наметнат темпо, ритам, и ќе мора да покажеме дека оној резултат со Италија не беше случаен. Нормално, сега ќе биде потешко треба да играме и создадеме многу шанси. Но, воопшто не се сомневам во овие момци кои многу пати досега покажале како се игра за репрезентацијата и под притисок, и сигурен сум дека можеме до три бода. Да покажеме уште еднаш дека Македонија вреди, дека Македонија има квалитет, и дека Македонија умее против секаков тип на екипи“.
Македонја утре од 20:45 часот на националниот стадион на Малта во Та Кали го игра квалификацискиот дуел од Групата Ц против Малта. По четири натпревари Македонија има четири бода во групата, а Малтежаните се без бодови.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
