Македонските кошаркарски прволигаши веќе земаат залет за комплетирање на ростерите за наредната сезона, откако првиот дел од летото мина во неочекувана пасивност од речиси сите клубови.
Активно е и во таборот на КК Кожув, каде најпрвин беше постигнат договор со македонскиот селектор Алек Јончевски да остане на клупата и за наредната сезона, по што прволигашот од Гевгелија работи активно на засилување на играчкиот кадар.
Во однос на ростерот од ланската сезона веќе е договорено да останат Горан Главчев и Илија Колев, двајцата домашни играчи од Гевгелија кои ќе бидат адути на Јончевски и во новиот шампионат. Покрај нив, начелно се договорени уште три нови играчи со кои наскоро и официјално ќе бидат потпишани договори. Пандев ќе биде од помош во рекетот по трансферот од редовите на МЗТ Скопје, а од таборот на „металците“ пристигнува и Митевски, кој ги надмина проблемите со повредата и ќе му биде на располагање на Јончевски.
Покрај овие двајца кошаркари, во Кожув се враќа и Димитар Караџовски, искусниот плејмејкер кој си замина од Пелистер и од неколкуте понуди ја избра онаа на гевгелискиот прволигаш.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА