Масимилијано Алегри не го криеше разочарувањето откако Јувентус загуби на домашен терен од Удинезе, па „старата дама“ за првпат сезонава врза два пораза во Калчо-лигата.
Ова значи и зголемување на негативата во однос на лидерот Интер на дури седум бода, а Алегри се соочува со предизвик што поскоро да најде излез од непосакуваната ситуација.
„Ова е тежок момент, освоивме само еден бод во последните три рунди. Мораме да се вратиме во ритам и да го оствариме она што е наша главна цел – да стигнеме до место во ЛШ за наредната сезона. Ситуацијата не е добра, но факт е дека немавме среќа со Удинезе. Противникот даде гол од единствениот шут што го упати, додека ние само во првото полувреме имавме три-четири одлични шанси“, изјави Алегри.
Тој уште еднаш потенцираше дека Интер е апсолутен фаворит за титулата и дека погледите на Јувентус се насочени во друг правец.
„Фактот што бевме толку блису до Интер секогаш ни беше мотивација, но мораме да бидеме реални. Но јас и тогаш велев дека Интер има неверојатна сезона, тоа е одличен тим и проект што се гради со години наназад и не сум изненаден од нивните резултати: Ние пред две години тргнавме по еден поинаков пат, нашата цел е повторно да играме во Лигата на шампионите“, истакна стратегот на Јувентус.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
