Одличните настапи во репрезентативниот дрес и се почестото учество на големите натпреварувања придонесоа македонските одбојкари да добијат на цена на европскиот пазар. Така, денеска Ристо Николов го комплетираше трансферот во Швајцарија, за неколку часа подоцна својот нов клуб да го обелодени и Александар Љафтов.
Македонскиот ас ќе стане првиот во историјата на мак-одбојката што ќе заигра во италијанската лига (која важи за најсилна во Европа) откако денескаа го потпиша договорот со екипата на Порто Робур Коста од Равена. Италијанскиот прволигаш официјално потврди дека е потпишан едногодишен договор со Љафтов, кој би требало да биде големо засилување за Порто Робур во битката за што подобар пласман во наредната сезона.
Со ова продолжува европската одисеја на Љафтов, кој покрај во Македонија има настапувано и во Турција, Србија, Кипар, Романија, Хрватска и во Бугарија, каде даде значаен придонес во освојувањето на првата титула на Хебар од Пазарџик во клупската историја.
„Пресреќен сум што ќе станам дел од тимот од Равена и ќе добијам шанса да заиграм во италијанската лига. Ова е првенство во кое досега немам играно, што ќе ми биде само мотив повеќе, убеден сум дека ќе бидам на висина на задачата. Кога зборував со тренерот Занини, јасно беше ставено до знаење дека приоритет ќе биде опстанок во Супер-лигата, но се надевам дека сите заедно ќе направиме уште подобар резултат“, изјави Љафтов по потписот на договорот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
