Ракометарите на Алкалоид вечерва во 19 часот го играат најзначајниот натпревар во оваа натпреварувачка сезона, реваншот на домашен терен против романскиот прволигаш Баја Маре во четвртфиналето од ЕХФ Европскиот куп.
Влогот е огромен, пласман во европско полуфинале со што Алкалоид би продолжил да испишува успешни страници во клупската историја. На првиот меч во Романија, и покрај чудниот судиски критеирум, избраниците на Кире Лазаров со одличното второ полувреме стигнаа до реми, останувајќи без победа поради подарениот пенал што Баја Маре го доби од арбитрите по истекот на времето.
Лазаров верува во својата екипа, но и предупредува дека ќе мора да се одигра максимално во текот на сите 60 минути ако се сака да се стигне до посакуваниот исход.
„Се наоѓаме во еден период кога ќе се бориме како клуб за влез во полуфинале од едно европско натпреварување. Овој реванш е од големо значење како за Алкалоид, така и севкупно за македонскиот ракомет. Кас сум горд што успеавме да одиграме квалитетно и да се избориме за еден позитивен резултат, што не е нималку лесно, особено кога гостувате на ривал во Романија. Претпазлив сум пред овој реванш бидејќи таа снимка што ја добивме како клуб е преполовена, второто полувреме воопшто не е снимано… ќе пробаме да се соземеме, да одиграме квалитетен меч. Првиот дуел беше со груба игра, во која домаќините имаа само две исклучувања, а секој старт им беше исклучително груб. Се надевам дека овојпат судиите ќе ги санкционираат нивните грубости. Не сакам да ја испуштиме шансата, мораме да извадиме максимум, да вложиме додаден напор за да стигнеме до резултатот што сите го посакуваме. Се надевам дека ќе собереме сили, да стигнеме до позитивен резултат и да се радуваме на европско полуфинале“, изјави тренерот на Алкалоид, Кире Лазаров.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
