Шахистите на Алкалоид завршија на 4. место во конкуренција на 66 екипи на Европскиот клупски куп на шампионите. Нов европски клупски шампион во шах е екипата Обиетиво одПадова, Италија, со освоени максимални 14 бода од седум мечеви, откако во последното коло славеше токму против Алкалоид со 3,5-2,5.
По серијата од три високи победи во претходните кола, во меѓусебниот решавачки меч во последното коло, екипата на Алкалоид влезе со императив за победа која ќе значеше и втора шампионска титула. Меѓутоа, во рана фаза на партиите Ковалев на шестата табла дојде во непријатна, послаба позиција, и неговиот противник не ја испушти шансата да освои цел поен. На првите три табли шахистите од италијанската екипа одиграа цврсто и солидно, па сите обиди на Мамедјаров, Андреикин и Шанкланд да постигнат предност останаа без успех, и тие партии завршија со реми, како и Криворучко на петата табла. На четвртата табла, во борбена игра, во одреден момент Инаркиев оствари мала предност, но таа се покажа недоволна за победа, иако долго се обидуваше нешто да извлече од позицијата. Конечен резултат во мечот е минимален пораз за Алкалоид 2,5-3,5.
Во конечниот пласман екипата на Алкалоид се пласира на четвртото место, со 10 меч бодови, одржувајќи се и натаму, во континуитет, при врвот на европските клупски натпреварувања. Одлична игра покажа лидерот на екипата, велемајсторот Мамедјаров кој со три победи и две реми освои златен медал за најдобар личен резултат на првата табла. Покрај него, Ковалев освои сребрен медал на шестата табла.
Второто место го освои „АВЕ Нови Бор“ од Чешка, а третото „Медниј Всадник“ од Русија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
