Пролет денеска го очекува нов натпревар од Супер-лигата, последен пред репрезентативната пауза во кој скопскиот суперлигаш ќе му гостува на составот на Радовиш со почеток во 18 часот.
Радовишани се последни на табелата со само еден бод на своето салдо, но во таборот на Тинекс Пролет се свесни дека најголемата грешка што може да се направи е да се потцени противникот. Токму затоа, фокусираноста во текот на сите 60 минути ќе биде главен фактор за да се стигне до бодови на овој меч.
„Изгледот на табелата не е најреална слика за квалитетот на противникот. Имаме играно бројни незгодни средби на овој терен, знаеме дека во Радовиш може да се победи само ако се даде 100% од себе, така ќе биде случај и денеска. Точно е дека квалитетот е на наша страна, но тоа мора да се покаже и на теренот. Затоа, се ќе зависи од нас самите, ако одиграме како што знаеме ќе стигнеме до бодовите, но тоа во никој случај нема да биде лесно. Победата ни е неопходна за да фатиме приклучок во борбата за Топ 6, по серијата тешки средби што ги имавме ова ќе биде одлична можност за триумф и зголемување на самодовербата пред дуелот со Бутел кој ќе не очекува по репрезентативната пауза“, вели Ласко Андоновски, капитенот на Тинекс Пролет.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
