Капитенот на Пролет, Ласко Андоновски, не крие дека е задоволен од настапите на својот тим, како во подготвителниот период, така и во првиот овосезонски меч на кој беше забележана рутинска победа над Јуниор КВ.
„Играме навистина квалитетен ракомет. Суштината е во тоа што огромен дел од екипата од ланската сезона остана во Пролет, а засилувањатаа кои беа доведени експресно се адаптираа и донесоа дополнителен квалитет во нашата игра. Одбраната со која диригира голманот Ангелов функционира беспрекорно, што ни овозможи уште на самиот почеток да го скршиме отпорот на Јуниор КВ во првото коло. Најважно од се е да го задржиме ваквиот пристап, да играме максимално ангажирано, ако го сториме тоа пласманот во плејофот не би требало да биде доведен во прашање“, истакнува капитенот Ласко Андоновски.
Следен предизвик за Тинекс Пролет е утрешниот дуел на домашен терен против Астраион (19.30 часот).
„Новите суперлигаши вообичаено влегуваат мотивирани во првите натпревари, го видовме тоа и со Астраион кој во првото коло славеше над Радовиш. Струмичани сигурно не се наивен противник, квалитетот е на наша страна, но само со максимално залагање ќе можеме да го скршиме нивниот отпор и да прокнижиме нови бодови“, порачува Андоновски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
