Фенербахче по подолга пауза успеа да врзе две победи во низа во Евролигата, откако тимот на нашиот Перо Антиќ триумфираше на гостувањето во Русија против Уникс Казан со резултат 81-86.
Турскиот шампион беше на прагот на убедлива победа откако во третиот период стигна до двоцифрена предност (42-54), но Уникс Казан успеа да се врати пред се благодарение на Орландо Џонсон, кој своите 16 поени ги постигна во второто полувреме. Рускиот состав дојде до „минус три“ и имаше напад на нешто повеќе од една минута до крајот, но Фенербахче успеа да се одбрани во клучниот момент, потоа да реализира две слободни фрлања преку Дувериоглу и да си ја завери победата.
Перо Антиќ одигра 18 минути, период во кој погоди две тројки од четири обиди за вкупно седум поени, надополнети со два скока и две асистенции. Датоме беше најефикасен кај Фенербахче со 18 поени, додека Богдановиќ ја заврши средбата со 16 поени, 7 асистенции и 5 скокови.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
