Арсенал нема намера да се откаже од трката за титулата, но паралелно со водењето на тимот во завршницата од оваа сезона Микел Артета ги планира и активностите за претстојниот преоден рок. Ангажманот на нов голгетер е еден од приоритетите на „топчиите“ по слабата сезона што ја имаше Габриел Жезус, а Артета досега разгледуваше неколку опции кои важат за скапи на пазарот.
План А беше Александар Исак, но Њукасл не само што го има проценето својот најдобар стрелец на над 100 милиони фунти, туку и „црно-белите“ намат намера да го продадат Швеѓанецот во текот на летото. Осимен исто така е желба на Артета, но асот на Наполи моментно е најблиску до ПСЖ, додека Душан Влаховиќ веќе стави до знаење дека не планира летово да ги смени клупските бои.
Англиските медиуми најавуваат дека Арсенал е подготвен да ја промени стратегијата и да донесе фудбалер што е далеку поевтина варијанта од горенаведените, а кој сигурно би му бил од помош на Артета. Станува збор за Џошуа Циркзе, холандскиот интернационалец од редовите на Болоња кој игра во извонредна форма и е меѓу најзаслужните што „болоњезите“ моментно се хит-екипа во Калчо-лигата.
Циркзе е проценет на 40 милиони евра, сума што „топчиите“ без проблеми би ја платиле, а она што особено му се допаѓа на Артета е фактот дека Холанѓанецот добро се снаоѓа на неколку различни позиции во нападот, што го прави идеален кандидат за тимот на шпанскиот стратег.
За овој фудбалер сериозен интерес покажува и Милан, но ако се земат во предвид финансиските проблеми на „росонерите“ јасно е дека Арсенал би бил голем фаворит во „аукцијата“ за потписот на Холанѓанецот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
