ЕКИПА во Хернинг,
Стеван Цаневски
Павле Атанасијевиќ даде огромен придонес во ремито против Португалија, откако бекот доби невообичаена улога како лево крило по повредите на Џонов и на Петар Атанасијевиќ.
Павле беше одличен во оваа улога постигнувајќи важни голови при камбекот во второто полувреме, а на денешниот меч со Романија позицијата ќе ја дели со искусниот Гоце Ојлевски, кој синоќа пристигна во Хернинг и му се стави на располагање на стручниот штаб.
„Јас сум тука за да помогнам и да го направам сето она што селекторот ќе го побара од мене. Ситуацијата беше таква, немавме леви крила, среќен сум што дадов свој придонес и секогаш ќе дадам се од себе, без оглед на која позиција ќе треба да играм. Сега е тука Ојлевски, така што мислам дека ќе бидеме во ред. одигравме одличен меч со Португалија, се вративме од негатива, би рекол и дека ја имавме победата во наши раце, но на крајот заврши со реми. Сега мораме да го оставиме тој меч зад себе и целосно да се фокусираме на Романија. Едно е сигурно, секој од нас ќе даде се од себе, целта е јасна, да победиме на овој натпревар. Подготвени сме за добар дуел, нека победи подобриот, верувам дека тоа ќе бидеме ние“, истакна Павле Атанасијевиќ во пресрет на денешниот дуел.
Мечот меѓу Македонија и Романија на програмата е вечерва со почеток во 18 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
