Шкендија утре против Лудогорец ќе „брка“ пласман во групната фаза на Лигата на Европа престојната есен. Иако има обезбедено групи во Лигата на Конференции, сепак, македонскиот првак посакува да игра во второто по ред клупско натпреварување во Европа.
Тренеорт на Шкендија, Јетон Беќири за утрешниот меч вели дека очекува да биде тежок, но исто така напоменува дека неговите избраници ќе дадат максимум.
„Нормално дека не очекува тежок натпревар бидејќи играме против тим кој игра Европа секоја година. Затоа треба да дадеме максимум и да одиграме сериозно бидејќи немаме многу простор за подготовка со почетокот на домашното првенство, но ние секогаш ќе гледаме да дадеме максимум. Мора да бидеме сериозни и во Европа и дома. Од нас се очекува да дадеме максимум. Сите противници со кои играме освен првото коло имаат голем квалитет. Освен мечот во Баку мислам дека на сите други мечеви одигравме добро. Притисокот е помал од претходните години кога Шкендија играла плеј-оф. Сега имаме обезбеден настап во Лигата на Конференции и затоа сме помирни. Но, јас не бев задоволен во Баку само поради тоа што немавме психолошки притисок. Уморот и квалитетот на противникот, уште ако се додаде лош ден и имаш грешки кои не се прифатливи за вакво натпреварување. Играме против екипи кои што можат од малку шанси да те победат. Видовме што се случи синоќа на мечот меѓу Ференцварош и Карабах“, вели Беќири.
Беќири кажа дека го анализирал противникот, и дека добро знае од каде доаѓа нивната најголема опасност, но и кои се нивните слаби страни.
„Ние ја собираме секоја информација за противникот, конкретно за Лудогорец. Јас ги следев двата меча на Балкани против Лудогорец лани, тие имаат нов стручен штаб сега и нови фудбалери. Но, јасно ни е дека и тие знаат многу работи за нас. Ние ќе се обидеме да покажеме добар фудбал, да се бориме и да изненадиме еден противник кој е фаворит на хартија. Ние треба да учиме во овој период, да учиме од овие противници, бидејќи сме во момент кога учиме и сметаме дека Шкендија од година во година мора да расте и да расте како клуб. Сите против кои играме се екипи кои со години инвестираат, Стеауа, Карабах, Лудогорец… затоа играат постојано во групите“, дополни стратегот на тетовските „црвено-црни“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
