Шкендија одигра само 0-0 на последниот меч за оваа година, на домашен терен против Гостивар, со што тетовци ја препуштија есенската титула на тимот на Силекс (кратовци имаат 37 бода по 18 рунди, исто колку и Шкендија и Работнички, но и најдобра гол-разлика од овие три екипи).
„Одигравме квалитетен меч против еден од најсилните тимови во македонското првенство. Мислам дека ние доминиравме, создадовме чисти шанси, но не реагиравме како што треба во клучните моменти. Некогаш за победа треба и малку среќа, но јас сум задоволен од покажаниот карактер, од желбата на моите фудбалери да играат добар фудбал и да сторат се за да победат“, изјави Јетон Беќири.
Тренерот на Шкендија смета дека вистинските возбудувања допрва следат и дека трката за титулата ќе биде исклучително неизвесна.
„Лани за титулата се бореа три екипи, годинава во трката за пет клубови, така што ќе биде многу интересно, но и многу потешко да се стигне до посакуваниот трофеј. Наша цел е најпрвин да одработиме добри зимски подготовки, да ја кренеме формата кај сите фудбалери и потоа максимално подготвени да го дочекаме стартот на вториот дел од сезонава“, порачува шефот на стручниот штаб на тетовци.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
