Олимпија Милано не успеа да ја прекине серијата слаби резултати во Евролигата откако тимот на нашиот Ненад Димитријевиќ во драматична завршница загуби на гостувањето против Басконија (88-83). Милано речиси цел меч беше во негатива, а токму Македонецот со својот блесок и деветте поени за нецели четири минути во четвртата четвртина го вратија италијанскиот првак целосно во натпреварот.
Димитријевиќ погоди по офанзивен скок и донесе израмнување, но во неизвесна завршница тој не доби шанса за шут, неговите соиграчи промашија, а Басконија предводена од одличниот Трент Форест стигна до победата. Македонскиот кошаркар го заврши мечот со 15 поени, два скока и две асистенции, со 21 поен најефикасен беше Миротиќ (шест погодени тројки), а прв стрелец на победничката Басконија беше Форест со 22 поени.
Олимпијакос во дербито на колото славеше на домашен терен над Реал Мадрид со 79-69, меч што го пресуди катасрофалната последна четвртина на „кралевите“ кои за десет минути постигнаа само 10 поени (23-10 за Олимпијакос). Везенков со 23 поени ги предводеше стрелците кај победничкиот тим, 19 поени и 9 скока имаше Мекисик, додека Хезоња со 15 поени беше прв стрелец на Реал Мадрид.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
