Вардар успешно ги финишираше преговорите со Владица Брдаровски, по што десниот бек потпиша нов договор со актуелниот шампион со важност до 2019 година. Брдаровски веќе две години е дел од Вардар, откако во летниот преоден рок 2015 година дојде во таборот на првакот од таборот на унгарски Ѓер.
„Среќен сум што ја продолжив верноста со Вардар и што ќе бидам дел од најдобриот клуб во Македонија и во следните две години. Благодарност до раководството, до стручниот штаб и до играчите кои што имаат дел од заслугата за ова. Мое е да работам напорно да ја оправдам довербата која ми е укажана. Секогаш кога сум играч за Вардар, сум го давал максимумот тимот да дојде до победа и до успеси, и така ќе биде и во иднина. Играм во најдобрата екипа во Македонија која секогаш има амбиции да биде на првото место на табелата и секогаш да освојува титули. Мислам дека е крајно време ова лето да го направиме и тој толку посакуван исчекор на меѓународна сцена, во Лигата на шампионите“ – изјави Брдаровски за официјалната веб-страница на Вардар.
Дефанзивецот во минатата сезона беше трет на листата со најголема минутажа во Вардар. Тој одигра пропушти три натпревари, и вкупно 2478 минути настап во шампионатот. Од неговото доаѓање до сега, Брдаровски го носеше дресот на „црвено-црните“ на 52 официјални меча.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
