Второлигашот ГФК Охрид од стартот на оваа година со промени во раководните структури ќе биде предводен од македонските фудбалски легенди, поранешни репрезентативци Данчо Целески и Гоце Толески.
Целески и Толески на чело на раководството на клубот ќе се обидат да го стабилизираат охридскиот второлигаш и повторно да го вратат како респектабилен фудбалски колектив на домашната сцена.
Данчо Целески е едно од најголемите голмански имиња во историјата на македонскиот фудбал, долги години голман број еден во македонската репрезентација, кој зад себе има богата интернационална кариера во Унгарија и во Турција, а беше член и на стручниот штаб на македонската репрезентација под водство на Среќко Катанец.
Гоце Толески, кој исто така е поранешен македонски репрезентативец, во својата кариера беше член и на чешките Сигма, Млада Болеслав, Мост и Славија Прага како и на Вакер Бургхаузен.
„Првичната наша цел е да го стабилизираме клубот. Вративме во екипата неколкумина млади играчи од Охрид, а планирани се и засилувања со кои во пролетниот дел ќе го потврдиме второлигашкиот статус. Плановите се следната сезона да атакуваме повисоко на табелата“ – порачува новиот менаџерски двоец на Охрид.
На чело на стручниот штаб на ГФК Охрид, пак, останува Пепи Џигероски, а ќе му помага Александар Бакулески, кој ќе биде играч – помошник тренер.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
