Најголемото име на македонскиот фудбал, Дарко Панчев во разговор за српските медиуми ги изнесе своите впечатоци пред денешниот натпревар на Црвена Звезда против кипарски Пафос во плеј-оф квалификациското коло за Лигата на шампионите.
Црвена Звезда е на прагот на ново учество во главната фаза од ЛШ, а пред плеј-оф серијата Панчев се потсетува и на натпреварот што го одигра во дресот на тимот од „Маракана“ против Аполон во 1991 година.
„Како да не се сеќавам на тие натпревари. Првиот го игравме дома против Аполон, победивме со 3-1, лесно, без никакви проблеми, исто така победивме таму без никакви проблеми со 0-2, без поголеми напори. Кога на овој начин објаснувам како ги победивме, можеби изгледа дека бевме премногу силни. Во тоа време, југословенскиот фудбал беше навистина добар, лигата беше многу посилна од кипарската лига. Ние како тим и остатокот од Југославија бевме среќни кога добивавме противници од Швајцарија, Австрија, а исто така и од земји како Грција, Кипар и Турција. Тоа беше реалноста. Сега сето тоа веројатно се промени, фудбалот многу се израмни, особено по распадот на Југославија, со другите земји веројатно повеќе нема таква разлика како што беше во наше време“ – вели Панчев.
Потоа го анализираше Пафос, но се осврна и на двомечот со Лех.
„Би сакал да се осврнам на последниот натпревар, не знаеме доволно за полската лига, но Лех остави добар впечаток, тоа е многу добар и сериозен тим. Сега кога поминаа овие два натпревари, разбирам дека не беше лесно да се победи ниту Лех, бидејќи тие се навистина добро организиран тим, дисциплиниран, организиран, можеби немаат никакви големи ѕвезди, но се многу интересен тим. Сега Пафос е повторно голема непозната. Гледам дека постојат само 11 години. Кога постоите како клуб 11 години и веќе имате одредени успеси, тоа е показател дека сопственикот, кој е Русин, колку што сум видел, е многу сериозен во врска со изградбата на моќен тим што ќе игра значајна улога во Европа. Мора да се биде внимателен, мора да се знае дека тие се добар тим, на крајот на краиштата, апсолутно не е лесно да се елиминира Динамо од Киев, но се надевам дека Звезда, која е поголемо име со огромна традиција, на крајот ќе успее повторно да дојде до главната фаза од Лигата на шампионите“.
Дарко верува дека трибините на стадионот „Рајко Митиќ“ ќе бидат комплетно исполнети и дека избраниците на Владан Милојевиќ ќе имаат голема поддршка од трибините.
„Поддршката од навивачите беше исклучително важна дури и во наше време. Во наше време имаше 80 или 90 илјади навивачи, бидејќи капацитетот беше двојно поголем, а сега е солидна бројка од 50 или 55 илјади. Звезда има многу навивачи, толку многу луѓе го сакаат клубот и го носат во своите срца што не треба да им се каже ништо посебно. Дефинитивно ќе дојдат и ќе го бодрат својот тим од срце. Повеќе од убеден сум дека стадионот ќе биде исполнет и дека ќе им ја дадат вистинската поддршка за да дојдат до својата цел во моментов, а тоа е есен во ЛШ“ – заклучува Дарко Панчев.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
