Барселона не се откажува од обидите да доведе врвен крилен фудбалер по левата страна кој би настапувал во тандем заедно со Ламин Јамал. Желбата е иста како и минатото лето, Нико Вилијамс од Атлетик Билбао кој блеска заедно со Јамал во дресот на шпанската репрезентација, па јасна е желбата на каталонскиот гигант да го обедини овој тандем и на клупско ниво.
Каталонскиот весник „Ел Мундо Депортиво“ објави дека директорот Деко денеска отпатувал за Билбао со јасна цел – да го убеди Нико да се приклучи на овој проект. Воопшто нема потреба да се преговара со Атлетик бидејќи клубот од Баскија би ја прифатил само клаузулата од 60 милиони евра и ништо помалку, но минатото лето се покажа дека потешкиот дел од задачата е да се убеди самиот фудбалер да си замине од „Сан Мамеш“.
Тој тогаш реши да остане и да потпише нов договор со Атлетик, но каталонците се убедени дека овојпат ќе успеат во намерата – да го доведат Нико на „Камп Ноу“. Платата од 12 милиони евра по сезона не би требало да биде проблем, но факт е дека Барса по еден ваков трансфер ќе мора и да продава од сопствениот играчки кадар за да може да го регистрира Вилијамс и да не си создаде проблеми како што тоа беше случај со ланскиот трансфер на Дани Олмо.
Претходно каталонците се поврзуваа и со Луиз Дијаз, но инсистирањето на Ливерпул на отштета од околу 100 милиони евра придонесе Барса да го олади интересот за Колумбиецот и да тргне во тотална офанзива по Нико Вилијамс.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
