Нови три натпревари се денеска на програмата на ЕВРО 2024, кои ќе донесат огромни возбудувања за фановите ширум фудбалска Европа. Србија и Словенија го отвораат натпреварувачкиот ден, по што ќе следи репризата од полуфиналето на последното ЕП, дуелот меѓу Англија и Данска.
„Крем на денот“ ќе биде вечерашниот дуел во кој европскиот првак Италија ќе се сретне со Шпанија, која во првото коло ја декласираше Хрватска со 3-0.
СЛОВЕНИЈА – СРБИЈА 15 часот
Шест од последните осум пресметки меѓу овие две сеелкции завршиле нерешено.
Словенија и Србија последен пат се сретнаа во 2022, како дел од Лигата на Нации. Србија славеше со убедливи 4-1 на домашен терен во Белград, а реваншот во Љубљана заврши 2-2.
Александар Митровиќ постигна по еден гол на последните две средби против Словенија.
Словенија има само два пораза на последните 22 средби во сите натпреварувања (од Финска со 2-0 и од Данска со 2-1 во квалификациите за овој европски шампионат).
ДАНСКА – АНГЛИЈА 18 часот
Англија никогаш досега не славела на првите две средби од едно европско првенство.
Англија е без примен гол на последните пет средби од групната фаза на ЕП, најдолга ваква серија во историјата на европските шампионати.
Данска има само една победа на последните шест групни средби на ЕВРО 2020 (едно реми и четири порази), онаа од 4-1 над Русија со која обезбеди пласман во нокаут фазата и потоа стигна до полуфиналето.
ШПАНИЈА – ИТАЛИЈА 21 часот
Италија има само еден пораз во регуларниот дел од мечевите (без пенал-рулети) на последните десет дуели со Шпанија на големите натпреварувања, оној од 4-0 во големото финале на ЕВРО 2012.
Шпанија има три победи на досегашните три дуели со актуелните европски шампиони на ЕП, со 2-1 над СССР во 1964, со 1-0 над Германија на ЕП 1984 и со 2-1 над Грција на ЕП 2008.
Шпанците имаат само еден пораз со Луис де ла Фуенте како селектор (девет победи и едно реми), бележејќи седум победи на последните седум натпревари.
Италија има само еден пораз на своите последни 12 средби, оној од 3-1 на гостувањето против Англија во квалификациите за ЕП, меч одигран минатиот октомври.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
