Џудо федерацијата на Македонија постигна исклучителен и историски успех на 77. Конгрес на Европската џудо унија (EJU), одржан во Лас Палмас, освојувајќи две високи европски признанија, информираат од Македонскиот олимписки комитет.
Џудо федерацијата беше прогласена за „Најдобар европски организатор за 2025 година“, за врвната организација на Европското првенство за кадети и EYOF — настани реализирани со извонреден професионализам, прецизност, висок организациски стандард и посветеност кон сите учесници, што остави силен и позитивен впечаток кај европските федерации.
Дополнително, претседателот на Џудо федерацијата на Македонија, Владимир Трпаноски, беше одликуван со престижната награда „Херој на годината“ од Европската џудо унија — признание за неговото лидерство, визија и континуиран придонес во развојот и промоцијата на европското џудо.
На Конгресот, г. Трпаноски лично го прими признанието „Најдобар европски организатор 2025“ во име на федерацијата, потврдувајќи го силниот институционален напредок и организациските капацитети на македонското џудо.
Признанието официјално е потпишано од претседателот на Европската џудо унија, д-р Ласло Тот, на 14 декември 2025 година.
„Македонскиот олимписки комитет упатува искрени честитки до Џудо федерацијата, целиот организациски тим, волонтерите, судиите, клубовите, институциите и сите партнери кои со својата посветеност, професионалност и тимска работа придонесоа за овој голем европски успех. Овие високи европски признанија се силна потврда за квалитетот, кредибилитетот и растечкиот углед на македонското џудо на европската и светската спортска сцена“ – порачаа од МОК.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
