Женскиот тим на Вардар стартуваше со летните подготовки, а амбициите се јасни – да ги следи стапките на машкиот тим и да се искачи на кровот на Европа. Минатата година не успеа за малку, беше многу блиску, но не успеа да стигне до европското злато во Лигата на шампионите. Екипата деновиве ќе ги изврши потребните лекарски прегледи, ќе се тренира во Скопје а потоа се заминува на Златибор.
Нови ракометарки сезонава во екипата се Драгана Цвијиќ, Мирјета Бајрамовска, Јована Саздовска, Теа Керамичиева и Полена Кизнецова. Тренерот Ирина Дибирова најавува напорни подготовки, а желбата е да се стигне до европскиот трон.
„Најважно е да тренираме добро. Имаме доста време додека почне лигата на шампионите. Ќе се обидеме да најдеме и доволно противници за да ја одржуваме формата. Верувам дека и новите ракометарки брзо ќе се вклопат во нашиот систем. Ако се договори повторно да се игра Регионалната лига ќе биде уште подобро. Сакаме да стигнеме до европскиот трон, но сега сме фокусирани на нашата подготовка. Задоволна сум што сите играчи и летниот период го искористиле за тренирање, па ќе биде полесно за сите“, вели Ирина Дибирова, тренерот на Вардар, за официјалниот сајт на клубот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
