Столе Димитриевски ќе ја чува мрежата на Македонија на вечерашниот дуел со Белгија, во обид да го запре „атомскиот напад“ на „црвените ѓаволи“ и да ја задржи нашата национална селекција на врвот на квалификациската група.
Воедно, Димитриевски со денешниот настап ќе го прескокне екс-капитенот Стефан Ристовски на листата на играчи со најмногу настапи за националниот тим. Двајцата во пресрет на дуелот во Гент имаат по 82 меча за Македонија, Димитриевски вечерва по 83-ти пат ќе го брани голот на нашата репрезентација, искачувајќи се на шестото место на ова рангирање.
Столе потоа до крајот на овој квалификациски циклус ќе може да скокне и на петтото место ако се знае дека пред него е Величе Шумуликоски со 84 средби во дресот на македонската репрезентација.
Горан Пандев е апсолутен рекордер по бројот на настапи за Македонија (122), а од активните фудбалери најмногу одиграни средби во репрезентативниот дрес имаат Александар Трајковски (96) и Џани Алиоски (87).
И Александар Трајковски ита кон „Клубот 100“ во кој се единствено Горан Пандев и Гоце Седлоски. Со четирите натпревари на репрезентацијата во октомври и во ноември, Трајковски веќе може да се приклучи во „Клубот 100“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
