Ненад Димитријевиќ не успеа да се закити со трофеј во Купот на Италија откако со тимот на Олимпија Милано загуби на домашен терен од Трентино со убедливи 63-79. Финалето беше дуел на кој Милано важепе за апсолутен фаворит, но италијанскиот првак одигра катастрофално во нападот, шутот од далечина воопшто не функционираше (1/20 за тројка) и на крајот заслужено го загуби натпреварот.
Првото полувреме мина во израмнета борба во која Трентино во самиот финиш успеа да се одлепи и на одмор да замине со водство од 31-38. Не само што Милано не се врати, туку кошаркарите на Трентино во третиот период уште повеќе се одлепија, а во последните десет минути го зададоа финалниот удар, славеа со „плус 16“ и се закитија со првиот куп-трофеј во клупската историја.
Димитријевиќ мина само 12 минути на теренот и реализираше само еден поен, надополнет со еден скок и две асистенции. Двоцифрен ефект кај Милано имаа само Миротиќ со 20 и Лидеј со 12 поени.
Македонскиот плејмејкер веќе утре ќе допатува во Скопје и ќе се приклучи на националниот тим за финалните квалификациски средби за Евробаскет 2025, против Естонија на гостински терен и против Полска пред своите гледачи.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
