Работнички има предност од 1-0 по првиот натпревар од финалната серија со МЗТ Скопје, но Марин Докузовски не е задоволен од она што неговите избраници го прикажаа на првиот меч во салата „Градски парк“. Искусниот стратег е свесен дека за победа на гостински терен на „црвено-белите“ ќе им треба подобра игра од онаа што ја прикажаа во неделата, па веќе им ставил до знаење на играчите на Работнички што очекува од нив.
„Пред се сметам дека мораме да го подобриме пристапот. По прегледувањето на снимката увидовме многу ситуации во кои не реагиравме најдобро, очекувам тоа да се корегира, со самото тоа и да донесе резултат. Не верувам дека може да дојде до некое преголемо тактичко изненадување, ваквите дерби натпревари ги решава инспирацијaта на теренот и затоа сметам дека главниот збор ќе го имаат играчите“ – истакнува Докузовски.
Тој се соочи со неочекуван проблем, откако капитенот Димитар Мираковски заработи тешка повреда поради која нема да може да се врати на терените до крајот на оваа финална серија.
„Тоа е проблем, сите добро знаат колкаво е значењето на Мираковски за нашиот тим, сега во ротацијата остануваме без важен играч. Сепак, тоа ќе биде само мотив повеќе за останатите кошаркари да одговорат на предизвикот и да сторат се што можат за отсуството на Мираковски да не се почувствува премногу врз нашата игра“ – изјави трофејниот стручњак.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
