Во пресрет на новогодишните празници, Државна лотарија на Македонија во втората половина на месец декември ќе ја донесе магијата на празничното новогодишно расположение во Скопје преку реализација на караванот “Зимска новогодишна бајка”.
Проектот предвидува оддржување на еднодневни јавни настани кои ќе се оддржат во општините Центар, Чаир, Ѓорче Петров, Кисела Вода, Бутел, Карпош, Аеродром и Гази Баба.
Еднодневните настани ќе започнуваат во 18:00 часот и ќе траат до 23:00 часот.
Во првиот дел од програмата е предвидено оддржување на забавна програма за деца во која најмладите жители на општините во Скопје ќе имаат можност да уживаат во настапот на Детскиот фестивал Поточиња, а истовремено и да проследат театарската претстава на Театарот Чекори, бесплатно да се фотографираат со Дедо Мраз и да се забавуваат со маскотите на омилените ликови од најпопуларните цртани филмови.
Во вториот дел од програмата ќе се оддржи голем музички концерт во кој граѓаните ќе можат да уживаат во звуците на македонската песна, а за добрата забава ќе се погрижат ДНК, Андријана Јаневска, Лина Пејовска и Огнен Здравковски.
Скопјани ќе имаат можност на настаните да уживаат со топол пијалок и добра храна.
Караванот ќе започне во општина Центар на 17.12.2024 година на скверот Јадран, а ќе заврши во општина Гази Баба на 29.12.2024 година на плоштадот во Автокоманда.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
