Продолжуваат проблемите на Реал Мадрид со повредите на првотимците. Голманот Кејлор Навас се здоби со повреда на мускулот од десната нога на натпреварот Хондурас – Костарика.
По препорака од докторот на Реал, Навас го пропушти вториот меч на својата селекција против составот на Панама, а нема да биде во составот на „кралевите“ за дуелите со Хетафе в сабота, и Тотенхем во Лигата на шампиони, меч закажан за вторник, 17 октомври. Костариканецот се приклучува на Бејл, Карвахал, Ковачиќ, Бензема, Марсело и Тео Ернандез, „тимот“ од повредени фудбалери на Реал.
Сепак, и не е се така црно за Реал и Зидан. Вирусната инфекција на Дани Карвахал, која му правеше проблеми при работата на неговото срце, е успешно отстранета по терапијата која Шпанецот ја конзумираше по препорака од медицинскиот тим на „кралевите“. Засега не се знае уште колку ќе отсуствува Карвахал од терените, но од клубот тврдат дека нема да брзаат со неговото опоравување, за да не се случат дополнителни компликации.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
