Играчот на Лајпциг, Дани Олмо е блиску да се врати во Барселона, пишува „Мундо Депортиво“. Во текст насловен како „Почна операцијата Олмо. Ситуацијата е сериозна“, шпанскиот медиум го најавува „кам-бекот“ на играчот од средниот ред во каталонскиот тим.
Медиумот јавува дека веќе бил одржан состанок на челните луѓе на клубот со претставниците на Олмо, и дека сега нема да се оди по неговите услуги по „заобиколен пат“ како што било порано, туку конкретно и прецизно, и дека сакаат целата работа да ја завршат пред почетокот на Европското првенство.
Евентуалното заминување на Олмо ќе може да отвори едно место за Елиф Елмас, кој и натаму е во потрага по поголема минутажа во Лајпциг. Исто така има најави за заминување и на Чави Симонс, кој е пред враќање во ПСЖ. Со тоа Елмас би имал отворено место во првите 11 на германскиот тим.
Пред неколку дена тиражниот БИЛД го прогласи Елмас како големо зимско промашување на Лајпциг, и дека секогаш пред него има двајца подобри играчи во моментот. Тренерот Марко Розе коментираше дека Елиф секогаш добро тренира и добро се однесува, но дека понекогаш работите не може да се оценуваат на тој начин.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
